Kristiansand Elliidgárdi lea 12 kilomehtara nuorttabeal Kristiansanda, E 18 bálddas. Gárdi lea rabas juohke beaivvi birra jagi diibmu 10.00 rájes. Rabasáiggit rievddadit áigodagaid mielde, muhto allaáigodaga lea Gárdi rabas diibmu 19.00 radjái.
Mis leat badjel 100 iešguhtetlágan eallišlájat, maiddai eksohtalaš eallit nu go sibirjalaš stábatgáhtut, ledjonat, orangutaŋŋat ja širaffat. Dasa lassin leat mis feara makkár geasuhusat ja guoimmuhanfálaldagat. Kaptein Sabeltann bivnnuhis bearaščájálmas lea čájehuvvon juohke geasi jagi 1990 rájes stuora olmmošvalvviide. Eará bivnnuhis geasuhusat Elliidgárddis leat Dimppárrenne Nilen, Bob-bana ja vuojadanbáiki Geassesuolu (Sommerøya).
Historja
Elliidgárdi rahppui vuosttaš geardde jagi 1965, muhto almmolaš rahpan lei easkka jagi maŋŋil, jagis 1966. Guhtta investora, eanaš Kristiansand shipping-birrasis, serve ásahit selskáhpi. Bohte máŋga váttis jagi heajos ruhtadiliin, muhto jagi 1970 lei badjebáza rehketdoaluin.
Muhtun stuora dáhpáhusat Gárddi historjjas: Julius riegádii 1979, Astoáigegárdi huksejuvvui 1983, vuosttaš Kaptein Sabeltann-čájalmas čájehuvvui 1990, jagi 1991 rahppui Kardemomme gávpot ja jagi 2000 lei Skomakergata rabas. Jagi 2002 bohte sibirjalaš stábatgáhtut ja jagi maŋŋil ásahuvvui Elliidgárdefestivála. Jagi 2007 oaččuimet ledjoniid.
Kaptein Sabeltann
Kaptein Sabeltann eahketčájalmas čájehuvvo juohke geasi, sullii golbma vahku suoidnemánus. Čájalmasat álget diibmu 23.00. Beaivet sáhtát vásihit Kaptein Sabeltann Máilmmi. Dáppe gávnnat vaikko man ollu gávppiid ja boradanbáikkiid. Fina maiddai Miriam geidojuvvon viesus dahje vuolgge borjjástit ”Den Sorte Dame” mielde!
Doaimmat
Astoáigegárddis gávnnat Dimppárrenne Nilen, Bob-bana, Ruvkevákki, togabána Reli Safari, Juŋgelriika, biilabána ja ollu eará. Dasa lassin lea mis vuojadanbáiki ”Geassesuolu” ja Fanasbasara gos leat karuseallat, spealut ja ollu suohttasat stuorrái ja smávvái.
Eallit
Elliidgárddis leat eambbo go 100 iešguhtetlágan elliidšlájat ja 500 individa buot máilmmi guovlluin. Báikkiin Áfriika, Mierkameahcci ja Stábatgáhtu riika sáhtát buorebut oahpásnuvvat elliide buot máilmmi guovlluin. Dáppe leat tropihkalaš gearbmašat ja heavnnit ja eksohtalaš eallit nu go sibirjalaš stábatgáhttu, orangutáŋŋa, ja savanne-eallit nu movt širáffa, antilopa ja gnu – namuhan dihte moadde ealli. Mis lea maiddai sierra ossodat gos leat davviriikaid eallit, Davviriikalaš Meahcci, gos lea albbas, sarvvis, čeavrris, geatki, lidnu ja gumpe.
Elliidgárdefestivála
Elliidgárdefestivála lea stuora kulturfestivála mánáide geassemánu maŋemus vahku, mas oassálastin lea deháleamos fáddá. Dát lea mánáide jagi suohttaseamos vahkku. Mánát oassálastet gelddolaš bájiin juohke beaivvi, dáppe leat elliidbiigaskuvllat ja sirkusskuvla ja turnenskuvla ja musihkkabádji.
Kardemomme gávpot
Kardemomme gávpot lea huksejuvvon juste nu movt lea Thorbjørn Egner girjjiin tevdnejuvvon. Dáppe sáhtát gizzut Tobiasa dordnii, oaidnit ledjona gean rievvárat veddet dahje máistit láibojeaddji buriid bolláid. Dan áigge go eanemus olbmot fitnet min luhtte, lea gávpot ealáskahtton go leat neavttárat geat láhttejit gávpoga ássin.
Skomakergata
Skomakergata lea huksejuvvon Bjørn Rønningen ja NRK TV juovlaráiddu ”Jul i Skomakergata” mielde.
Idjadeapmi
- Kardemomme gávpot: 8 viesu Kardemomme gávpot 33 viesus leat láigomassii.
- Bartagiláš, hálbbibut molssaeaktu 5-, 6- ja 8-olbmo barttaiguin
- Rica Dyreparken Hotel, ollugat gohčodit dan Noas Ark, lea jur boađáhagas.
- Quality Hotel & Resort Kristiansand lea juste nuppi bealde geainnu Elliidgárddis.
Billeahttahattit
Billeahttahattis lea beassan Elliidgárdái, Astoáiggegárdái, Kardemomme gávpogii, Geassesullui ja buot guoimmuheapmái dábálaš rabasáiggi. (Speallan Fanasbasaras ii leat mielde dán hattis). Eanet dieđuid; Riŋges Elliigárddi diŋgonkantuvrii tlf. 38 04 98 00.
Dehálaš dieđut
Biilla guođđi: Leat buori biilaguođđinvejolašvuođat jur boađáhagain. Gaskamuttos geassemánu – borgemánu lea bisanandivva biilabisanansajiin (Jahkekoartadoallit guđđet biilla nuvttá). Jorit ja vovnnat: Joriid, mánnávovnnaid, jumešvovnnaid ja juvlastuoluid sáhttá mis láigohit. Beatnagiid orrunbáiki: Lea čavgadit gildojuvvon váldit elliid mielde Gárdái. Mis lea beatnagiidda orrunbáiki boađáhaga Øst lahká.